2 way Switch වයරින් පරිපථය...

අද මම ඔයාලාට අරගෙන ආවේ,නිවාස සහ ගොඩනැගිලි වයරින් කිරීමේදී බහුලව භාවිතා කරන පරිපථයක්.මෙම 2 way Switch වයරින් පරිපථය,තරප්පු පෙළවල් ආශ්‍රිතව බහුල වශයෙන්ම භාවිතා කරනු ලබයි.එනම් යම් කෙනෙකු තරප්පු පෙළ නැගීමට යාමේදී අසල ඇති ස්විචයෙන් ,තරප්පු පෙලේ බල්බය දල්වා ගන්න අතර,ඔහු එම තරප්පු පෙළ නැග  අවසන් වූ පසු ඒ අසල ඇති ස්විචයෙන් එම බල්බය නිවා දමයි. ඉන් පසු නැවතත් ඔහු තරප්පු පෙළ බැසිමේදී අසල ඇති ස්විචයෙන් ,තරප්පු පෙලේ බල්බය දල්වා ගන්න අතර,ඔහු එම තරප්පු පෙළ බැස   අවසන් වූ පසු ඒ අසල ඇති ස්විචයෙන් එම බල්බය නිවා දමයි.

මේ ආකාරයට 2 way Switch වයරින් පරිපථය යොදා ගත හැකි තවත් ස්ථානයක් වන්නේ අපගේ නිදන කාමරයයි.එනම්, කාමරයට ඇතුළුවීමේදී,කාමරයේ දොර අසල ඇති ස්විචයෙන් නිදන කාමරයේ බල්බය දල්වා ගන්න අතර ඇද අසල ඇති ස්විචයෙන් එම බල්බය නිවා දැමිය හැක. මේ අනුව මෙම පරිපථය අපගේ නිවාස හෝ ගොඩනැගිලි තුලත් සහ ඉන් පිටතත් විවිධ ස්ථානයන්හි යොදා ගත හැකි බව දැන් ඔබට වැටහෙනු ඇත.

ඉතින් මේ සදහා ඔබට අවශ්‍ය වන්නේ 2 Way Switch දෙකක් තමයි. 2 Way Switch එකකට වයර් 3 ක් සවි වනවා. එම වයර් 3 සවි කරන ස්ථාන,Common, L 1, L 2 වශයෙන් සලකුණු කර තිබෙනවා.පහතින් මම ඉදිරිපත් කරලා තිබෙන්නේ එම 2 way Switch වයරින් පරිපථයයි.

එම පරිපථය අනුව එක් ස්විචයක L 1 ස්ථානයත් අනෙක් ස්විචයේ L 1 ස්ථානයත් වයර් මගින් සම්බන්ධ කල යුතු වන අතර එක් ස්විචයක L 2 ස්ථානයත් අනෙක් ස්විචයේ L 2 ස්ථානයත් වයර් මගින් සම්බන්ධ කල යුතු වෙයි. ඉන් පසු Neutral වයරය කෙලින්ම අදාල බල්බයට ලබා දිය යුතු අතර, එක ස්විචයක Common ස්ථානයට Live වයරයත්, අනෙක් ස්විචයේ Common ස්ථානය  බල්බයේ අනෙක් අග්‍රයටත් සවි කල යුතු වේ.